უნაყოფობის პრობლემასთან პირველი შეჯახება, თუ მრავალ-წლიანი ბრძოლა – ორივე შემთხვევაში, ეს არის პრობლემა, რომელთან გამკლავებაც მსოფლიოში უამრავ წყვილს უწევს. საერთაშორისო სტატისტიკის მიხედვით, ყოველი 6 წყვილიდან – ერთი მათგანი იბრძვის უშვილობის პრობლემის დასაძლევად, რაც საშუალოდ ზრდასრული მოსახლეობის 17.5%-ია. საბედნიეროდ, თანამედროვე მედიცინა დღითი-დღე ვითარდება და მშობლობის ოცნების ახდენა უფრო და უფრო ხელმისაწვდომი ხდება ყველასთვის.
უშვილობის გამომწვევი მიზეზები თანაბრად შეგვიძლია ვეძიოთ როგორც ქალში, ასევე მამაკაცში. თუმცა, ამ ბლოგში ვისაუბრებთ ქალის მიზეზით და სამედიცინო ჩვენებით გამოწყვეულ უნაყოფობაზე, მის შესაძლო მიზეზებზე და მკურნალობის შესაძლო ვარიანტებზე.
მამაკაცის მიზეზით გამოწვეულ უნაყოფობაზე ბლოგის სანახავად, ეწვიეთ ბმულს
ქალთა უნაყოფობის საერთო ფაქტორებია:
- ოვულაციის დარღვევები: არარეგულარული ოვულაცია, ან მისი არარსებობა არის უნაყოფობის წამყვანი მიზეზი ქალებში. სამედიცინო ჩვენებებმა, როგორიცაა პოლიკისტოზური საკვერცხეების სინდრომი (PCOS) და ჰორმონალური დისბალანსი, შეიძლება ხელი შეუშალოს ოვულაციის პროცესს.
- ფალოპის მილების ბლოკირება: ფალოპის მილების ობსტრუქციამ, ან დაზიანებამ შეიძლება ხელი შეუშალოს კვერცხუჯრედის განაყოფიერებას, ან შეაფერხოს განაყოფიერებული კვერცხუჯრედების საშვილოსნოში მიგრაცია.
- საშვილოსნოს ანომალიები: საშვილოსნოს სტრუქტურულმა პრობლემებმა, როგორიცაა ფიბროიდები, პოლიპები ან თანდაყოლილი მანკები, შეიძლება გავლენა იქონიოს ნაყოფიერებაზე და იმპლანტაციაზე.
- ენდომეტრიოზი: ეს მდგომარეობა ჩნდება, როდესაც საშვილოსნოს ლორწოვანი ქსოვილი იზრდება საშვილოსნოს გარეთ, რაც იწვევს ანთებას, ნაწიბურების წარმოქმნას და ნაყოფიერების პრობლემებს.
- ასაკთან დაკავშირებული უნაყოფობა: ასაკის მატებასთან ერთად, კვერცხუჯრედების რაოდენობა და ხარისხი იკლებს, რაც ართულებს ჩასახვის პროცესს. დედის ასაკი დაკავშირებულია უნაყოფობისა და ორსულობის გართულებების უფრო მაღალ რისკთან.
ქალთა უნაყოფობის დიაგნოსტიკის მეთოდები
დაორსულების სირთულეების წინაშე, ქალები გადიან სხვადასხვა დიაგნოსტიკურ კვლევებს გამომწვევი მიზეზების დასადგენად. ეს კვლევები შეიძლება შეიცავდეს:
- სამედიცინო ისტორია და ფიზიკური გამოკვლევა: დეტალური შეფასება ინდივიდის სამედიცინო ისტორიის, გადატანილი დაავადებების, მენსტრუალური ციკლის სტაბილურობის, ცხოვრების წესის ფაქტორების და რეპროდუქციული ჯანმრთელობის პრობლემების შესახებ.
- ოვულაციის თვალყურის დევნება: მენსტრუალური ციკლების, სხეულის ბაზალური ტემპერატურის მონიტორინგი და ოვულაციის პერიოდის დაკვირვება – რათა დადგინდეს ხდება, თუ არა ოვულაცია რეგულარულად.
- ჰორმონის ტესტირება: სისხლის კვლევები ჰორმონების დონის შესაფასებლად, როგორიცაა ფოლიკულის მასტიმულირებელი ჰორმონი (FSH), ლუტეინირების ჰორმონი (LH), ესტროგენი და პროგესტერონი, საკვერცხეების ფუნქციისა და ჰორმონალური ბალანსის შესაფასებლად.
- ვიზუალიზაციის კვლევები: ულტრაბგერითი კვლევა, ჰისტეროსალპინგოგრაფია (HSG) ან ჰისტეროსკოპია საშვილოსნოს, ფალოპის მილების გამოსაკვლევად და ნებისმიერი სტრუქტურული პათოლოგიის, ან ბლოკირების გამოსავლენად.
- საკვერცხის სარეზერვო ტესტირება: ქალის დარჩენილი კვერცხუჯრედების რაოდენობისა და ხარისხის შეფასება, როგორც წესი, კეთდება სისხლის ანალიზით ანტი-მიულერის ჰორმონის (AMH) და ანტრალური ფოლიკულების რაოდენობის (AFC) გაზომვით.
ქალთა უნაყოფობის მკურნალობის ვარიანტები
- მედიკამენტები და ჰორმონალური თერაპია: მედიკამენტები შეიძლება დაინიშნოს ოვულაციის სტიმულირებისთვის, ჰორმონალური დისბალანსის დასარეგულირებლად, ან ძირითადი პირობების მართვისთვის, როგორიცაა PCOS და ენდომეტრიოზი.
- დამხმარე რეპროდუქციული ტექნიკა (ART): პროცედურები, როგორიცაა ინვიტრო განაყოფიერება (IVF) და ინტრაციტოპლაზმური სპერმის ინექცია (ICSI) მოიცავს კვერცხუჯრედისა და სპერმის ლაბორატორიულ გარემოში გაერთიანებას და მიღებული ემბრიონების საშვილოსნოში გადატანას.
- ქირურგიული ჩარევები: კონკრეტული მიზეზიდან გამომდინარე, ქირურგიული პროცედურები შეიძლება ჩატარდეს საშვილოსნოს ანომალიების აღმოსაფხვრელად, ფიბროიდების და პოლიპების მოსაშორებლად, ან ჩაკეტილი ფალოპის მილების გასათავისუფლებლად.
- ცხოვრების წესის ცვლილებები: ჯანსაღი ცხოვრების წესის დამკვიდრება, მათ შორის დაბალანსებული დიეტის დაცვა, რეგულარული ვარჯიში, სტრესის მართვა და მავნე ჩვევების თავიდან აცილება, როგორიცაა თამბაქოს მოხმარება და ალკოჰოლის ჭარბი რაოდენობით მიღება – ამ ყველაფერმა შეიძლება დადებითად იმოქმედოს ნაყოფიერებაზე.
იცოდეთ, რომ უნაყოფობა ქალბატონებში ერთ-ერთი ფართოდ გავრცელებული მდგომარეობაა და ნუ დაადანაშაულებთ საკუთარ თავს იმაში, რაც თქვენს შესაძლებლობებს აღემატება! ჩვენ შემოგთავაზეთ ზოგადი და ყველაზე გავრცელებული მიზეზები, დიაგნოსტიკის მეთოდები და მკურნალობის გზები. გამოცდილი ექიმი-რეპროდუქტოლოგი დაგეხმარებათ შეარჩიოთ თქვენთვის ყველაზე ეფექტური მიმართულება, უშვილობის პრობლემის დასაძლევად და მკურალობის მიმართულების შესარჩევად.
ყურადღებით გაეცანით ზოგად ინფორმაციას, გათვითცნობიერდით და მოემზადეთ ახალი თავგადასავლისთვის, რომელსაც მშობლობისკენ მიმავალი გზა გთავაზობთ.
კონსულტაციისთვის, დეტალური ინფორმაციისთვის და ექიმთან ვიზიტის დასაგეგმად – მოგვმართეთ.
ინ ვიტრო ლაიფი ყოველ ნაბიჯზე თქვენს გვერდით!